Авыл

Тукай районы Сәйдәшев исемендәге хуҗалыкта быел барысы 34 бала төрле эшләрдә булышкан

10 көннән дә ким эшләмәгәннәргә премияләр бирелде.
08.09 22:00

(Тукай районы, 8 сентябрь, "Татар-информ", "Якты юл"). Җәйге чорда Тукай районы Сәйдәшев исемендәге хуҗалыкта быел барысы 34 бала төрле эшләрдә булышкан, дип яза җирле басма.

Ислам Габидуллин уракка чыкканчы әтисе белән үзләре утырасы «ДОН-1500» комбайнын ремонтларга йөргән. Ислам – гаиләдәге өч малайның иң өлкәне икән, шуңа да әтисенең уң кулы ул. Әниләре Альбина да хуҗалыкта эшли – сыерлар сава.

Флүр Сәйфуллин абыйсы белән шулай ук «ДОН-1500» комбайнында эшләгән. Абыйсы Раил – аграр университет студенты – үзе дә әле мөстәкыйль рәвештә комбайн штурвалы артына быел беренче мәртәбә утырган. Егетләрнең әтиләре Азат хуҗалыкта баш инженер. Бәлки шуңадыр, улларына да техника җене кагылган, Флүр инде былтыр ук җәйге каникулында слесарь булып эшләгән. Алай гына да түгел, егетләрнең бабалары Рәсим Сәйфуллин, карт әбиләре Саимә Әшрәфуллина авылда атаклы комбайнчылар булганнар.
Ислам да, Флүр дә мәктәптә яхшы укыйлар, көрәш түгәрәгенә йөриләр, Сабантуйда үз яшьтәшләре арасында призлы урыннарны беркемгә дә бирмиләр.
Предприятиенең кадрлар бүлегеннән хәбәр итүләренчә, Ислам белән Флүрдән кала, биредә комбайнчы ярдәмчеләре булып тагын 6 үсмер эшләгән. Алар –Рифат Сәгыйдуллин, Айназ Габидуллин, Илшат Габидуллин, Илдар Сәгыйдуллин, Адель Зиннәтуллин, Флүр Шәяхмәтов. Каникулларын жәлләмичә, иртән иртүк йокыдан торып, төнгә кадәр басуда булганнар үсмерләр.

Динар Газиев, Макарий Хисаметдинов һәм Марат Газетдинов болында маллар көткәннәр. Макарий – шәһәр малае, шулай да каникулын башыннан ахырына кадәр авылда файдалы хезмәттә үткәргән. Динар да көтүдә өч ай буе йөргән. Элиза Бәхтиярова һәм Гүзәл Сәгыйдуллина ашханәдә эшләгән. «Монысы да бик авыр хезмәт. Кызлар сынатмады», – дип бәя бирделәр аларга кадрлар бүлегендә. Рамазан Зыятдинов, Айрат Бәхтияров, Нияз Зыятдинов, Илнур Әлмиев слесарь ярдәмчеләре булып эшләгәннәр. Аграр универститет студенты Чулпан Сафина хуҗалыкка инде берничә ел рәттән булыша икән. Быел ул ашлык үлчәүдә торган. Диләрә Сәгыйдуллина, Илзирә Мөхәммәтдинова, Айгөл Хәлиуллина сенаж өчен кайткан яшел массаны үлчәгәннәр. Айзат Хуҗин, Айдар Насыйров, Инсаф Шәкүров һәм Алмаз Бәхтиев Иске Абдул бригадасында амбарда ашлык тутыруда ярдәм иткәннәр. Ландыш Газетдинова, Альмира Газиева, Диана Надиева, Аксана Горшкова, Гөлфинә Гатиуллина, Илшат Мәүләвиев, Инсаф Мәүләвиев фермада җыештыру-ремонт эшләрендә катнашканнар.

«Узган елларны җәйге каникул чорында хуҗалыкта эшләүче укучылар саны уртача 25ләп җыела иде, быел аерата күп булдылар, балалар бер-берсенә кызыгып чыктылар. Әлбәттә, һәрберсе үз кулларыннан килгәнчә хуҗалыкка файда китерде. 34 баланың 9ы мәшгульлек үзәге аша эшләде. Мәктәп укучыларына хезмәт хакларын 1 Сентябрь тантанасында тапшырдык. Шулай ук Рәхмәт хатлары, 10 көннән дә ким эшләмәгәннәргә премияләр бирелде», – диделәр хуҗалыкның кадрлар бүлегендә.

Ә бүген исә балаларның барысы да укуда. Эшләгәннәре хуҗалык өчен булса, өйрәнгәннәре үзләре өчен. Тир түгеп тапкан акчаның да кадере күпкә зуррак була.

 

 

КӨН ҮЗӘГЕНДӘ

Яшь тарихчылардан экскурсия: Казанның иң матур мәчетеннән алып Пләтән төрмәсенә кадәр

“Казань глазами инженера” проекты кысаларында Казанның Пләтән бистәсе буйлап экскурсия узды.

Юто Хишияма: Рус теле уңайлырак, дип, татар теленнән баш тарту милләтнең бетүенә китерә

Япон галиме фикеренчә, татар телен кирәкле һәм файдалы итү татарларның үзләреннән тора.

22 сентябрьнең төп вакыйгалары - фото һәм сылтамалар

Р.Миңнеханов Төрекмәнстан Министрлар Кабинеты вәкиле М.Бабаев белән очрашты, синоптиклар кырау төшүе турында кисәтә.

Рамил Курамшин юбилей кичәсе уздыра

Программада халык көйләре, татар композиторлары әсәрләре яңгыраячак.

«Сөембикә» журналы Бөтенроссия бәйгесендә җиңү яулаган

Авыл тормышы «Сөембикә»нең гомер-гомергә төп темаларының берсе булды.