Спорт

Мөселманнар спартакиадасында мөслимлеләргә тиң булмады

Спортчылар волейбол, кул көрәше, гер күтәрү, бадминтон, аркан тарту кебек ярышларда көч сынаштылар.
11.01 05:00

(Мөслим, 11 гыйнвар ,"Татар-информ", "Авыл утлары", Гөлзәрия Мөбарәк). Мөслимдәге универсаль спорт залында республика мөселманнарының кышкы спартакиадасы үтте. Анда 18 төркемдә уналты районнан килгән 300 дән артык спортчы көч сынашты, дип яза җирле басма.

Спорт уеннарын Мөслим районы имам-мөхтәсибе, “Җәмигъ” мәчете имам-хатыйбы Габделкәрим хәзрәт Моратов ачты. Һәм, Коръән аятьләре укып, спорт ярышларына фатыйхасын бирде. Аннары мөселман кардәшләрне Мөслим муниципаль район башлыгы Рамил Муллин сәламләде.

– Бу чара безгә ерак кардәшләр белән танышу-аралашу мөмкинлеге бирә. Уеннарда катнашкан һәр мөселман үз сәламәтлеген чыныктыру өстендә эшләвен, үзенең спортта да көчле икәнен күрсәтер. Бу дөньяда сәламәт булып, иман белән яшик, – диде Рамил Муллин кунакларга мөрәҗәгать итеп.

Спортчылар волейбол, кул көрәше, гер күтәрү, бадминтон, аркан тарту кебек ярышларда көч сынаштылар. Каршы алудан, уеннарның оештырылуыннан, хөкемдарлар эшеннән һәркем канәгать калды. Әгерҗе районы Яморза авылыннан килгән команда җитәкчесе Рамазан хәзрәт, мәсәлән, моңа кадәр Мөслимне республиканың иң ерак ноктасындагы караңгы бер почмак дип күзаллаган булган. Спартакиадага килгәч, моның капма-каршы булуына инанган. Кунагыбыз Мөслимдәге мөмкинлекләр киңлегеннән чын-чынлап гаҗәпләнүен белдерде.

– Рәхәтләнеп татар телендә барган спорт ярышларында катнашам. 50 мең халкы булган шәһәребездә нибары бер мәчет эшли, кардәшләр белән шунда аралашабыз, балаларыбызга дин дәресләре бирергә, туган телебезне сакларга тырышабыз. Спорт белән махсус шөгыльләнү юк, шулай да тәнебезне чиста, чыныккан итү өчен булган мөмкинлекләрне кулдан ычкындырмыйбыз, – диде Удмуртия җөмһүриятенең Можга каласыннан килгән Габдерәшит хәзрәт Нурзадә улы.

Иртәннән алып кичкә кадәр дәвам иткән киеренке ярышлардан соң, командалар арасында урыннар билгеләнде. Барлык төр бәйгеләрдә дә яхшы уен күрсәткән, физик яктан ныклы әзерлекле булуын күрсәткән Мөслим мөселманнары командасы республика спартакиадасының җиңүчесе дип табылды. Икенче урында – Актаныш, өченчедә – Сарман районы командалары. Җиңүчеләр аерым уен төрләре буенча да билгеләнде. Җиңүчеләргә дипломнар һәм Мөслим районы иганәчеләре ярдәме белән әзерләнгән кыйммәтле бүләкләр тапшырылды. Шулай итеп, республикабызның көньяк-көнчыгыш районнары спортчылары үзләренең матур уеннары белән ерак Удмуртиядән, Татарстанның Кукмара, Әгерҗе, Баулы кебек төбәкләреннән килгән спорт сөюче мөселман кардәшләргә безнең якларда спортка тартылуның көчле, мөмкинлекләрнең зур булуын дәлилләделәр.

 

 

КӨН ҮЗӘГЕНДӘ

Казанда яшәүчеләр Ленин бакчасына Керчьта һәлак булганнар истәлегенә чәчәкләр алып килә

Керчь политехника көллиятендә теракт аркасында 19 кеше үлгән һәм тагын 52 кеше яраланган.

Р.Миңнехановка Deutsche Invest Capital Partners туры инвестицияләр фондын тәкъдим иттеләр

Республика Президенты Татарстан Хөкүмәте йортында Goetzpartners компаниясе һәм туры инвестицияләр фондының гамәлгә куючысы Штефан Гетце белән очрашты.

Ленин бакчасында Керчьта теракт корбаннарына мемориал барлыкка килде

Казан кешеләре бакча үзәгендәге фонтан янына чәчәкләр һәм шәмнәр алып килә.

17 октябрьнең төп вакыйгалары - фото һәм сылтамалар

"Интертат" сайтына аңлатмалы, этимологик сүзлекләр урнаштырылды, Керчьта һәлак булганнар истәлегенә Ленин бакчасына чәчәкләр алып килделәр.

Әлфия Йосыпова татар теле дөньяда үз позициясен югалтмый дип белдерде

Милли мәдәният һәм мәгариф югары мәктәбе директоры әйтүенчә, Төркиянең 20ләп уку йортында татар теле фән буларак өйрәнелә.