Авыл

Советлар Союзы Герое Зариф Алимовны Татарстанда якташлары искә алды

Татарстан хезмәт ияләреннән җыелган акчага төзелгән танк броняларына “Татарстан колхозчысы” дип язылган булган.
01.02 18:22

(Казан, 1 февраль, "Татар-информ", "Туган як", Римма Мәүлетова). Кичә, 31 гыйнвар көнне, Яңа Кәкерле төп гомуми белем бирү мәктәбенең тарих һәм җәмгыять белеме укытучысы Илнур Закиров җитәкчелегендә 7 сыйныф укучылары Дилә Закирова, Венера Рахманова, 8 сыйныф укучысы Айгиз Мәхмүтов район үзәгенә килеп, үзәк паркта урнашкан Геройлар Аллеясында легендар якташлары, Советлар Союзы Герое Зариф Закир улы Алимовны искә алдылар. Бу турыда "Туган як" газетасы хәбәр итте.

Укучылар Зариф Алимовның Геройлар Аллеясында урнаштырылган бюсты янына Яңа Кәкерле төп гомуми белем бирү мәктәбе укучылары һәм укытучылары исеменнән чәчәкләр куйдылар. Укучылар, шулай ук, геройга һәм Бөек Ватан сугышы елларына багышланган шигырьләрен укыдылар, аның биографиясе белән таныштырдылар, авылдаш-геройны бер минутлык тынлык белән искә алдылар.

Илнур Закиров үзенең чыгышында авылдашларның гына түгел, барлык райондашларның да геройларыбызны истә тоту кирәклеген, аларның якты истәлеген буыннардан-буыннарга җиткерү мөһимлеген ассызыклады.

Советлар Союзы Герое Зариф Закир улы Алимов 1921 елда Яңа Кәкерле авылында туа. Сугышка кадәр колхозда хисапчы, аннары тракторчы булып эшли.

Колхозда хисапчы булып эшләгәндә, газетада яшьләрне тракторчылар курсына туплау турында белдерү күреп ала.Техника иярләү хыялы белән укырга керә. Зариф тырышып укый. Алдынгы механизатор буларак, күмәк хуҗалыкта күпләр өчен үрнәк булып тора.

Ул армия сафларына 1940 нчы елда чакырыла.Аңа сугышның беренче көннәрендә үк алгы сызыкта булырга туры килә. Лейтенант Зариф Алимов каты сугышларның берсендә нык яралана. Госпитальдә яралары төзәлер – төзәлмәс,  тагын сугышның алгы сызыгына ыргыла. Мотоукчылар бригадасының автоматчылар взводы белән командалык итеп, күп тапкыр батырлыклар күрсәтә.

1944 елның язында 3 нче Украина фронтына делегация килеп, 23 нче танк корпусына Татарстан хезмәт ияләреннән җыелган акчага төзелгән сугышчан машиналар тапшыра. Аларның броняларына “Татарстан колхозчысы” дип язылган була. Татарстанда туып үскән , үзенең сугышчан иптәшләре белән бергә һәрвакыт алда булган автоматчылар взводы командиры лейтенант Алимовка танк тапшырыла. Алар дошманны җиңәргә ант итәләр һәм үзләренең антына тугрылыклы калалар.

1944 елның мартында Украинаның көньягында корпус һөҗүм иткән вакытта, Алимов взводы дошманның көчле ике контратакасын да чигенергә мәҗбүр итә. Зариф Алимов бигрәк тә зур батырлык күрсәтә. Ул 21 августтан 3 сентябрьгә кадәр Румыния территориясендә барган сугышларда катнаша.

Татар халкының батыр улы Зариф Алимов 1945 елның 31 гыйнварында дошман белән каты сугышларның берсендә батырларча һәлак була. Аңа 1945 елның 24  мартында Советлар Союзы Герое исеме бирелә.

Көннең икенче яртысында исә Яңа Кәкерле төп гомуми белем бирү мәктәбендә Геройның истәлегенә багышланган чаңгы буенча ярышлар үтте.

КӨН ҮЗӘГЕНДӘ

14 августның төп вакыйгалары - фото һәм сылтамалар

Татарстанда урып-җыюның экваторына якынлаштылар, республикада кош гриппы буенча карантин гамәлдән чыга.

Р.Миңнеханов Чүпрәледә җир белән эшләүгә аерым игътибар бирелүен әйтте

Чүпрәледә гектарыннан 25 центнер алып, 45,6 мең тонна ашлык суктырылган.

Татарстан Президенты Буа районында урып-җыю барышы белән танышты

Районда бөртекле һәм бөртекле-кузаклылар мәйданының яртысыннан артыгы суктырылган.

Нәҗибә Ихсановага Азнакайдан якташлары авыл күчтәнәчләре алып килде

Бүген Татарстанның халык артисткасы Нәҗибә Ихсанова белән күрешергә дип, Азнакайдан бер төркем якташлары Казанга килде.

Римма Ратникова фотограф Рамил Галине Татарстан фотожурналистикасының исеме дип атады

Экспозициядә 80нче еллар ахыры – 90нчы еллар башындагы вакыйгалар, танылган сәясәтчеләр һәм җәмәгать эшлеклеләренең фотолары урын алды.