Спорт

Яшел Үзәндә «Татарстан чаңгы юлы» бәйгесе узды

Оешмалардан коллектив белән катнашучылар да күп иде.
12.02 22:00

(Яшел Үзән, 12 февраль, «Татар-информ», «Яшел Үзән», Гөлнара Вәлиева). Узган шимбәдә Яшел Үзәннең «Маяк» спорт комплексында, «Россия чаңгы юлы – 2018» Бөтенроссия массакүләм ярыш кысаларында, «Татарстан чаңгы юлы» бәйгесе узды. Ул  дистә еллар дәвамында әлеге иң популяр һәм киң җәмәгатьчелек спорт төре җанатарларын берләштерә, дип яза җирле басма.

Бу якты, масштаблы кышкы бәйрәмнең үзенең данлы тарихы бар һәм «Чаңгы юлы» илебезнең спорт тормышында елдан ел әһәмиятлерәк вакыйгага әверелә бара. Актив ялны үз итүчеләр арасында бу көнне күмәк стартта катнашу өчен чаңгыга басучылар саны гел артып тора. Татарстанда һөнәри һәм массакүләм спорт белән шөгыльләнү өчен яңа мөмкинлекләр булдыру өстендә эш дәвам итә. Моны, 6 ел дәвамында барлыкка килгән 1300 спорт объекты, республикабызның шәһәр һәм авылларында төзелгән 791 универсал спорт мәйданчыклары дәлилли. Ә спорт белән даими шөгыльләнүче татарстанлылар саны 40 процентка арткан (бу - республиканың һәр өченче кешесе, дигән сүз).

10 февральдә «Маяк» иртәнге сәгать 8дә инде кайнап тора иде. Алдан, чаңгы ярышында физик әзерлекле һәм сәламәт булуы турында табибтан рөхсәте булган һәркем катнаша, дип хәбәр итсәк тә, теләүчеләр болай ук күп булыр дип уйламаган идек.

Сәгать 10:00 – VIP чабышына старт бирелде. Район һәм шәһәр предприятие-оешмаларында физик яктан нык җитәкчеләр эшли икән. 2018 метр араны "ыһ" та итми чабып килделәр.

Ә 1,2 һәм 3 километр дистанциядә узышу бер-бер артлы дәвам итте. Оешмалардан коллектив белән катнашучылар да күп иде. Узышучылар өчен җанатарга килүчеләр танышларына көч-куәт биреп торды. «Татарстан чаңгы юлы – 2018» ярышында катнашучылар өчен иң мөһим бүләк - күңел күтәренкелеге һәм шәп кәеф булгандыр, мөгаен.

- Мондый күмәк чараларда катнашудан алган тәэсирләрне аңлатып бирерлек түгел! Искиткеч! Урман, саф һава, менә дигән итеп әзерләнгән трасса, уңай эмоцияләр һәм яхшы кәеф – болар барысы да сәламәтлеккә файда! Массакүләм спорт дәрәҗәсе күп яклап халыкның яшәү сыйфатын билгели. Бүген биредә узган ярыш буенча бәяләмә биргәндә, бездә ул сыйфат канәгатьләнерлек, минемчә, - дип, эмоцияләре белән уртаклашты Александр Тыгин.

 

КӨН ҮЗӘГЕНДӘ

Тунис товарларына Татарстанда һәм илнең башка төбәкләрендә ихтыяҗ бар

Бу хакта Татарстан Президенты Тунис Премьер-министры Юсеф Шахед белән очрашуда әйтте.

Рифкать Әхмәтҗанов әзерләгән этимологик сүзлекнең икенче бүлеген туганнары чыгарачак

“Татар теленең этимологик сүзлеге” авторы, инфаркт булу сәбәпле, вафат.

Татарстан Президенты Туниска хезмәттәшлектә яңа мөмкинлекләрне ачыкларга килүен әйтте

Безнең төбәк Россия белән Тунис арасындагы мөнәсәбәтләргә үз өлешен кертә, диде Рөстәм Миңнеханов Тунис сәүдә министры белән очрашуда.

Дәүләт хезмәтләре порталында эш эзләүчеләр өчен яңа мөмкинлек барлыкка киләчәк

Роман Шәйхетдинов ел азагына кадәр порталда эшли башлаячак яңа сервисларны әйтеп чыкты.

Рөстәм Миңнеханов һәм Евгений Дитрих 17 октябрьдә яңартылган Казан – Чаллы трассасын ача

М7 «Волга» федераль трассасының Казаннан Чаллыга кадәрге участогын реконструкцияләү эшләре 10 ел дәвам иткән.