Татар дөньясы

Рөстәм Тарико татар халкының өч көчле сыйфаты бар дип саный

"Русский стандарт" холдингы хуҗасы фикеренчә, бу сыйфатлар аның үзенә дә югары дәрәҗәгә ирешергә булышкан.
10.03 12:33

(Казан, 10 март, “Татар-информ”, Рәмис Латыйпов). “Русский Стандарт” холдингы хуҗасы, тумышы белән Минзәлә шәһәреннән булган Рөстәм Тарико “Татар-информ” мәгълүмат агентлыгына интервьюсында татар халкының көчле сыйфатлары турында сөйләде. Аның фикеренчә, татар халкын өч сыйфат көчле итә.

Рөстәм Тарико Советлар Союзындагы зур төзелешләр - "КАМАЗ", "НЕФТЕХИМ", авиация заводларының Татарстанда эшли башлавы очраклы хәл түгел. Моның сәбәбе татарларның эш сөючән булуында, дип саный ул. “Мин ул вакытлардан соң татар халкы тагын да зуррак уңышларга иреште дип уйлыйм”, - диде Рөстәм Тарико. 

Татар халкының икенче көчле сыйфаты дип, ул тыйнаклыкны атады. “Бу коллектив һәм партнерлар белән дөрес мөнәсәбәт урнаштырырга ярдәм итә”, - ди Тарико.

“Шулай ук, татарларны җаваплы дияр идем, алар вәгъдә иткән эшләрен эшлиләр. Бу сыйфат безнең илдә һәм чит илдә бөтен кешегә дә хас түгел. Шушы сыйфатлар конкуренциягә сәләтле итә, үземне шушы сыйфатлардан уңышлы файдалана алган кеше дип саныйм”, - диде Рөстәм Тарико.

Рөстәм Тарико 2004 елдан, Россиядә иң бай кешеләрнең берсе буларак, "Forbes" исемлегенә керә. Аның белән интервьюны “Интертат” сайтында укырга мөмкин.

  • Рөстәм Васильевич Тарико 1962 елның 17 мартында Татарстанның Минзәлә районында туа. Россиядәге аракы җитештерүче иң эре холдингларның берсе "Русский Стандарт" ширкәте һәм "Русский Стандарт" банкы, иминият компанияләре хуҗасы һәм җитәкчесе. 17 яшенә кадәр Минзәләдә яши, аннары Мәскәүгә күченеп китә. Мәскәү транспорт инженерлары институтын тәмамлый. "Бизнес Тур" туристлык агентлыгында, аннары Ferrero һәм Martini & Rossi Италия компанияләрендә эшли. 1992 елда ROUST Inc компаниясен оештыра һәм Martini, Smirnoff, Johnnie Walker алкоголь эчемлекләре белән сату итә башлый. 1998 елда «Русский Стандарт» компаниясен оештыра. Өч баласы бар - игезәк кызлары Анна һәм Ева (2003 елгы), улы Динар (2007 елгы).

КӨН ҮЗӘГЕНДӘ

Продюсер Миләүшә Айтуганова ике хатынлылык темасына фильм төшерергә җыена

«Татаркино» Гаяз Исхакыйның «Остазбикә» әсәре мотивлары буенча фильмга кастинг уздыра.

Футбол буенча дөнья чемпионатының мәдәни программасы: Казан Кремле

Чемпионат чорында музей-тыюлык территориясендә музыкаль фестивальләр һәм күргәзмәләр узачак.

“Татар кызы – 2018” бәйгесенең финал этабын “Татар-информ” онлайн күрсәтә

Бәйге бүген, 20 июнь көнне, 18.30 сәгатьтә Филармония концертлар залында үтәчәк.

Дөнья чемпионатында Россия җыелмасы Мисыр командасын җиңде

Россия җыелмасы тарихта беренче тапкыр вакытыннан алда финалның 1/8 этабына чыкты.

FISU Рөстәм Миңнехановны Жан Птижан медале белән бүләкләде

Татарстан Президентына бүләкне FISU президенты Олег Матыцин һәм генераль секретарь Эрик Сенрон тапшырды.