Татар дөньясы

Камал театры артисты Фәнис Җиһанша Мәскәү татарлары белән очрашты

Татарстанның атказанган артисты Фәнис Җиһаншаның Мәскәүдә иҗади сәфәре татар “Штабы” чакыруы белән оештырылды.
15.05 12:39

(Мәскәү, 15 май, "Татар-информ", Александр Долгов). Театр һәм кино артисты Фәнис Җиһанша катнашында Мәскәү татарлары “Штабы”нда “Хуҗа Насретдин Мәскәүдә” кичәсе, ораторлык осталыгыннан мастер-класс һәм Муса Җәлил исемендәге 1186 татар мәктәбендә очрашу уздырылды. Бу хакта Мәскәү татарлары  “Штабы”ның матбугат үзәге хәбәр итә. 

Данлыклы Камал театры актеры, Татарстанның атказанган артисты Фәнис Җиһаншаның Мәскәүдә иҗади сәфәре татар “Штабы” чакыруы белән оештырылды. “Штаб” лидеры Рөстәм Ямалеев сүзләренчә, артист катнашындагы чаралар Мәскәү татарларын туган телне саклау мәсьәләсендә уяту, активлаштыру максатында үткәрелде.

Беренче чиратта Фәнис Җиһанша 1186 мәктәп укучылары белән очрашты. Казан кунагын мәктәп мөдире Роза Шакирова-Хәбибуллина каршылады һәм мәктәп музейлары, белем йортының 20 еллык тарихы белән таныштырды. Шуннан соң Фәнис Җиһанша мәктәп укучыларына ораторлык осталыгыннан мастер-класс уздырды. Популяр артист балаларны дөрес сөйләм һәм чыгыш әзерләү серләренә төшендерде. Укучыларны бигрәк тә имтиханнан вакытында белгән мәгълүматларны онытмау, укытучы алдында каушап калмау проблемасы кызыксындырды.

Шулай ук Фәнис Җиһанша яшүсмерләр арасында туган телне саклау проблемасын әйтеп узды. Актер балаларны үзара татарча аралашырга, әти-әниләре белән туган телдә сөйләшергә чакырды.

“Әти-әниең сиңа русча дәшсә, син, татарча җавап биреп, аларны шакккатыр”, - диде актер Фәнис Җиһанша.

Мәктәптә очрашу Фәнис Җиһанша башкаруында Кол Шәриф монологы белән тәмамланды. Ахырда актер мәктәп һәм аның укучыларына соклануын белдерде. Аның сүзләренчә, татар ата-аналары балаларын 1186 мәктәпкә укырга күбрәк китерергә тиеш.

«Балаларның татар телен белүләре, ислам дине кыйммәтләрен аңлаулары шатландырды. Бу – Роза Шакирова җитәкчелегендәге укытучылар коллективның тырыш хезмәте нәтиҗәсе. Балачагыма кайта алсам, мин, һишчиксез, бу мәктәптә укыр идем”, - диде Фәнис Җиһанша.

Алга таба Фәнис Җиһанша татар “Штабы”нда яшьләр белән очрашу вакытында шулай ук ораторлык осталыгыннан мастер-класс үткәрде. Очрашуда 70ләп кеше катнашты. Беренче чиратта Фәнис Җиһанша данлыклы Камал театры тарихы белән таныштырды, татар киносы үсешенә тукталды һәм татар телен саклау проблемасын әйтеп китте. Шулай ук Мәскәү татар яшьләре башкалада татар театрын булдыру мәсьәләсен күтәрде.

“Мәскәүдә татар «Штабы» туган телне саклау үзәге булып тора. Минем аңлавымча, “Штаб” – Мәскәүдә татар теле, мәдәнияте һәм тормышы үзәге. Театрыбыз актерларының да биредә булганы бар. 2019 елның гыйнварында Камал театрының Мәскәүдә гастроле узачак. Барыгызны да безнең тамашаларга көтеп калабыз”, - диде Фәнис Җиһанша.

Кичә “Туган тел” җырын башкару белән тәмамланды.

КӨН ҮЗӘГЕНДӘ

20 августның төп вакыйгалары - фото һәм сылтамалар

Камил хәзрәт Сәмигуллин Корбан бәйрәме белән котлады, Татарстанда бөртекле һәм кузаклы культураларның 60 проценттан артыгы суктырылды.

Мәскәүдә Әлфия Авзалова истәлегенә концерт булды

Сәхнәдә Венера Ганиева, Марсель Вагыйзов, Алинә Шәрипҗанова, Илнар Миранов, Татарстан Дәүләт җыр һәм бию ансамбле артистлары чыгыш ясады.

Разил Вәлиев яшь укытучылар белән очрашуда туган телне ничек сакларга икәнен әйтте

“Чит телләр белү – байлык, туган телеңне белү – бәхет ул”, - диде Разил Вәлиев.

Васил Шәйхразиев "Татар моңы" бәйгесенең киләчәге булыр дип ышана

Камал театрындагы тамашаны Зөлфәт Зиннуров һәм Роза Әдиятуллина, Замирə Рəҗəпова һəм Ришат Əхмəдуллин алып бара.

"Татар моңы" бәйгесенең өч хөкемдарына халык артисты исеме бирелде

Г.Камал исемендәге театрда "Татар моңы" Халыкара яшь башкаручылар телевизион конкурсының гала-концерты бара.