Авыл

“Август-Мөслим” агрофирмасы басуларында чәчүлекләрне тәрбияләү, тукландыру эшләре бара

“Август-Мөслим” агрофирмасында яхшы нәтиҗәләргә ирешергә дигән максат белән эшлиләр.
08.06 06:00

(Мөслим, 8 июнь, "Татар-информ", "Авыл утлары", Фәридә Гайнетдинова). Мөслим районында язгы-кыр эшләре тулысынча төгәлләнде. “Август-Мөслим” агрофирмасы беренче чәчү сезонын тәмамлады. Бүген агрофирма басуларында чәчүлекләрне тәрбияләү, тукландыру эшләре бара, дип яза җирле басма.

“Август-Мөслим” компаниясе язгы кыр эшләренә зур әзерлек белән керде. Агрофирма 700 млн сумлык яңа техника гына алды. Безнең җирлектә беренчеләрдән булып “Август-Мөслим” агрофирмасында “Борго” чәчү комплексы кулланылды. Көнбагыш һәм кукуруз кебек культураларны чәчү өчен “KINZE” чәчкечләре файдаланылды. Гомумән, “Август-Мөслим” компаниясенең техника паркы бары тик заманча, иң яңа техника һәм агрегатлар белән тәэмин ителде.

“Август-Мөслим” агрофирмасы 28396 гектар җирне – элеккеге “Урожай” һәм “Ык” агрофирмалары җирләрен үз эченә ала. Язгы культуралар чәчелгән мәйдан 27691 гектар тәшкил итә. Агрофирмада пар җирләренә дә аерым игътибар бирелә, алар 769 гектар мәйданны били. Быелгы язгы чәчү кампаниясендә 19394 гектар мәйданда чәчү эшләре үткәрелде. Чәчү өчен югары уңдырышлы, яхшы сыйфатлы, элиталы сортларга өстенлек биргәннәр.

– Агрофирма буенча 4129 гектарда язгы бодай, 3472 гектарда арпа, 98 гектарда солы, 1112 гектарда борчак, 1003 гектарда кукуруз чәчелде. Шулай ук рапс, көнбагыш, җитен кебек техник культураларга да зур урын бирелде. Уҗым культуралары 3186 гектар тәшкил итә. Агрофирма кырларына ашлама да мул кертелде. Тәэсир итүче матдәдә исәпләгәндә, 1 гектарга – 85 килограмм, – ди агрофирманың баш агрономы Рәсим Мөхәмәтдинов.

Агрофирмада югары җитештерүчәнлеккә ия булган “Клаас”, “Ксерион”, “Акцион” тракторларыннан төзелгән сигез чәчү комплексы эшләде, эш ике сменада оештырылды. Җир җитешеп бетмәү сәбәпле чәчү эшләрен бераз соңрак башласалар да, августлылар әлеге мөһим чараны үз вакытында төгәлли алдылар.

– Үсентеләр матур гына тишелеп килә. Бүгенге көндә барлык басуларда бер кат химик эшкәртү үткәрелде, – ди “Август-Мөслим” агрофирмасы директоры Наил Муллин. – Чүп үләннәренә һәм корткыч бөҗәкләргә каршы көрәш дәвам итә. Агу-химикатларның да иң яңаларын кулланабыз: сусыз аммиак, сыек ашламалар һәм тукландыручы матдәләр кулланылды. Чәчүлекләрне тукландыруны да уңышлы алып барабыз. Шөкер, механизаторлар, шоферлар, барлык белгечләр дә – хезмәт сөючән, тәҗрибәле кешеләр. “Чебиләрне көзен саныйлар” дисәләр дә, быел без бөртеклеләрнең һәр гектарыннан 35 центнердан да ким булмаган уңыш алырга планлаштырабыз. Һава торышы да уңай килеп, бөртеклеләр мул уңыш белән куандырыр, дип өметләнәбез.

“Август-Мөслим” агрофирмасында яхшы нәтиҗәләргә ирешергә дигән максат белән эшлиләр, диелгән район хәбәрендә.

КӨН ҮЗӘГЕНДӘ

Рөстәм Миңнеханов: Бүген халык белән эшләү бөтенләй башка төрле

Социаль һәм электрон мәйданчыклар хакимият белән халыкның үзара элемтәсен радикаль рәвештә җиңеләйткән.

Истанбулда төрки дөньяның социаль челтәре – “Төркитуй” эшли башлады

"Төркитуй" - бер тамырдан килүче, төрки телләрдә сөйләшүче халыкларның бер-берсе белән уңайлырак аралашулары өчен булдырылган.

Татарстан хөкүмәте 2019 елда зур концерт залын төзү эшләренә керешергә ниятли

Хәзерге вакытта Татарстан җитәкчелеге объектның концепциясен раслый, төрле юнәлешләрне һәм мәйданнарны карый, диде Рөстәм Миңнеханов.

Рөстәм Миңнеханов: “Казан” милли-мәдәни үзәген Милли китапханә өчен зурайтачаклар

Мөмкинлекләре һәм җәлеп итүчәнлеге буенча “Казан” милли-мәдәни үзәге кебек урын башка бер җирдә дә юк, диде Татарстан Президенты.

Синоптиклар иртәгә Татарстанда һава шартлары бозылу турында кисәтә

23 сентябрьдә төнлә һәм иртән республика территориясендә һәм Казанда томан төшәчәк.