Спорт

Әлмәттә триатлон буенча ярышлар узды

Татарстанның триатлон буенча баш тренеры Сергей Яковлев ярышларны оештыру дәрәҗәсеннән бик канәгать булуын әйтте.
10.06 19:00

(Әлмәт, 10 июнь, "Татар-информ", "Әлмәт таңнары"). Бүген Әлмәттә янәдән спорт бәйрәме узды. Узган ел нефтьчеләр башкаласында дуатлон буенча ярышлар үткән иде. Шунысын билгеләп үтәргә кирәк, «Татнефть Альметьевский триатлон – 2018» — TIMERMAN сериясеннән триатлон буенча тәүге ярыш. Әлеге ярышлар өчен Әлмәтнең сайлануы очраклы түгел. Оештыручылар шәһәрдә моның өчен бөтен шартлар булын искәрттеләр, дип яза җирле басма. 

Ярышка шәһәр пляжында старт бирелде. Башта 2008-2014 елда туган балалар 600 метрга йөгерде. Аннан соң триатлончылар ярышларны суда йөзүдән башлады. Башта 750 метрга йөзү каралса да, көннең салкынлыгы һәм яңгыр сибәләве искә алынып аны 375 метрга калдырдылар. Икенче этап велосипедта узышу иде. Шевченко урамы буйлап 20 км араны узганнан соң, тимер атларын калдырып, 5 кмга йөгерделәр. Шәһәр күленә шәһәрдә яшәүчеләр – тамашачылар да җыелган иде. Алар һәркемгә көч-куәт биреп, кычкырып тордылар.

Триатлон ярышларында атаклы чаңгычы, Олимпия уеннары призеры Максим Вылегжанин да катнашты. Аның триатлонның бу төрендә беренче катнашуы булып чыкты. Ул финишка икенче булып килде.

– Бүген искиткеч яхшы көн. Барлык дистанция дә яхшы иде. Яңгыр әллә ни комачауламады. Җанатарлар да искиткеч булды, алкышлап торды, – диде ул.
Беренче урынны дуатлон буенча дөнья чемпионы Максим Кузьмин алды. Удмуртиянең 30 яшьлек әлеге спортчысы Швецариядә узган ярышта башта 10 км йөгереп, аннан велосипедта 150 км узып, тагын 30 км йөгереп алган. Ул Әлмәттәге ярышны үзе өчен яхшы тренировка булды дип бәяләде. Шулай ук трассаның югары дәрәҗәдә булуын искәртте.

Танылган спортчылар белән беррәттән старт сызыгына башкалар да басты. Барлыгы 9 команда һәм 70 тән артык кеше көч сынашты. Араларында район башлыгы Айрат Хәйруллин, ТР Президенты каршында эшмәкәрләрнең хокукларын яклау буенча вәкаләтле вәкил Тимур Нагуманов, район башкарма комитеты хезмәткәрләре дә бар иде. Алар да өч этапны да яхшы күрсәткечләр белән үтте.

– Бүген һәркемгә катнашу мөмкинлеге тудырылды. Безгә башка шәһәрләрдән, төбәкләрдән дә киләләр. Спорт ярышларында професионаллар өчен генә түгел, һәвәскәрләргә дә катнашу мөмкинлеге булу мөһим. Спорт белән шөгыльләнү ул үзеңне формада тотарга ярдәм итә. Сәламәт тәндә – сәламәт рух. Әлмәттә спортның 54 төре үсештә. Җаның теләгәнне сайла, – диде финишка килү белән үк безгә биргән интервьюсында район башлыгы.

Әлмәтлеләр сынатмады. Безнең өч кешедән торган чаңгычылар командасы беренче урын яулады. Тагын ике катнаш командабыз призлы урын алды – АМР-3 бронза, АМР-2 көмеш медальгә лаек булдылар. Беренче урында – Бузулук командасы.

Татарстанның триатлон буенча баш тренеры Сергей Яковлев ярышларны оештыру дәрәҗәсеннән бик канәгать булуын әйтте.

– Әлмәт триатлончылары да тәрбияләячәкбез. Яшьләрнең перспективасы яхшы. Әлмәт базасы көчле. Киләсе елга биредә Татарстан чемпионаты узлырырга уйлыйбыз, – диде ул.

КӨН ҮЗӘГЕНДӘ

Тунис товарларына Татарстанда һәм илнең башка төбәкләрендә ихтыяҗ бар

Бу хакта Татарстан Президенты Тунис Премьер-министры Юсеф Шахед белән очрашуда әйтте.

Рифкать Әхмәтҗанов әзерләгән этимологик сүзлекнең икенче бүлеген туганнары чыгарачак

“Татар теленең этимологик сүзлеге” авторы, инфаркт булу сәбәпле, вафат.

16 октябрьнең төп вакыйгалары - фото һәм сылтамалар

Татарстан Тунис белән хезмәттәшлек итәчәк, Габдулла Тукай турында китап тәкъдим ителде, беренче татар ораториясен студентлар әзерли.

Фәрит Мөхәммәтшин Әлмәт районы өлкәннәрен Ветераннар советының 40 еллыгы белән котлады

Татарстан Республикасы Дәүләт Советы Рәисенә ветераннар хәрәкәтендәге тырыш хезмәте өчен Мактау билгесе тапшырдылар.

Татар галимнәре Габдулла Тукай тәнкыйтьләгән шәхесләргә гадел бәя биргән

Без Тукайны “соңгы инстанциядәге хакыйкать” буларак кабул итәргә күнеккән, ди Татарстан Фәннәр академиясе хезмәткәре Марсель Ибраһимов.