Спорт

Көрәшчеләребезне танытырга кирәк, шул чакта җанатарлар да күп булыр – Җәүдәт Миңнәхмәтов

Халыкара көрәш федерациясе президенты журналистларны көрәшчеләр турында ешрак язарга өндәде.
14.06 13:47

(Казан, 14 июнь, “Татар-информ”, Лилия Гаделшина). “Көрәшчеләребезне танытырга кирәк”, – дип белдерде Халыкара көрәш федерациясе президенты Җәүдәт Миңнәхмәтов бүген “Татар-информ”да узган матбугат очрашуында. 16 июньдә Саба районы Миңгәр авылында көрәш буенча дөнья чемпионаты үткәрелүе уңаеннан ул журналистларга мөрәҗәгать итте.

Җәүдәт Миңнәхмәтов сүзләренчә, бүген Россиядә спорт төре буларак көрәшне үстерү өчен бөтен шартлар бар. Татарстанда гына да 30 меңләп кеше көрәш белән шөгыльләнә. “Безнең көрәш бик тамашалы, кагыйдәләр дә бер тәртипкә китерелде. Әмма, мәсәлән, кайсы көрәшченең җиде тапкыр яки биш тапкыр Россия чемпионы, 10 тапкыр Татарстан чемпионы булганын кем белә? Мәгълүмат җитмәү – бүген безнең эштә кимчелек булып тора. Бу мәсьәлә белән шөгыльләнергә кирәк. Халкыбыз милли геройларын белергә тиеш. Аларны бакча яшендәге балалар да, мәктәп укучылары да яхшы белергә тиеш. Шул чакта җанатарларыбыз булыр, көрәш бөтен дөньяга танылыр”, – дигән фикерләре белән уртаклашты ул.

Җәүдәт Миңнәхмәтов журналистларны көрәшчеләр турында ешрак язарга өндәде. 

16 июньдә көрәш буенча дөнья чемпионатында Россия җыелма командасы составында Татарстан данын 2017 елгы Дөнья кубогы иясе Азат Нурмөхәммәтов, көрәш буенча 2017 елгы Россия чемпионы Ренас Кәлимуллин һәм 2017 елгы Россия чемпионы Илмир Төхвәтуллин яклаячак. Командада шулай ук Россиянең башка төбәкләреннән – Төмән өлкәсеннән Егор Егоян һәм Альберт Рәхмәтуллин, Башкортстаннан Айнур Сыртаев, Мари Элдан Муса Галләмов бар. Россия җыелма командасының баш тренеры Фәрит Шәйхетдинов.

“Көрәш безнең өчен спорт кына түгел, ул – милли байлыгыбыз, – дип ассызыклады көрәшче Ренас Кәлимуллин журналистларга. – Минем бабам көрәшкән һәм ул мине дә өйрәтте, хәзер мин энеләремне өйрәтәм. Көрәш традицияләре буыннан-буынга күчә, халкыбызның бөтен дөньяга күрсәтерлек милли-мәдәни хәзинәсе булып тора”.

КӨН ҮЗӘГЕНДӘ

Тунис товарларына Татарстанда һәм илнең башка төбәкләрендә ихтыяҗ бар

Бу хакта Татарстан Президенты Тунис Премьер-министры Юсеф Шахед белән очрашуда әйтте.

Рифкать Әхмәтҗанов әзерләгән этимологик сүзлекнең икенче бүлеген туганнары чыгарачак

“Татар теленең этимологик сүзлеге” авторы, инфаркт булу сәбәпле, вафат.

Дәүләт Советы Рәисе Фәрит Мөхәммәтшин Әлмәттә Парламент дәресе бирде

Мондый дәресләр республиканың барлык мәктәпләрендә үткәрелә: депутатлар, җәмәгать эшлеклеләре укучылар белән күзгә-күз очраша, аңлату эшләре алып бара

16 октябрьнең төп вакыйгалары - фото һәм сылтамалар

Татарстан Тунис белән хезмәттәшлек итәчәк, Габдулла Тукай турында китап тәкъдим ителде, беренче татар ораториясен студентлар әзерли.

Фәрит Мөхәммәтшин Әлмәт районы өлкәннәрен Ветераннар советының 40 еллыгы белән котлады

Татарстан Республикасы Дәүләт Советы Рәисенә ветераннар хәрәкәтендәге тырыш хезмәте өчен Мактау билгесе тапшырдылар.