Фән һәм мәгариф

Илшат Нәсипов төбәкләрдәге татар кафедраларын сакларга кирәк, дип саный

Ул татар кафедраларының файдасы зур булуын, аларның татар мәгарифе сагында торуын әйтте.
10.07 19:21

(Казан, 10 июль, “Татар-информ”, Гөлнар Гарифуллина). Төбәкләрдә - азмы -күпме, мәгариф үзәкләре гамәлдә булган кафедраларны, көллиятләрнең һәрберсен сакларга кирәк. Мифтахетдин Акмулла исемендәге Башкорт дәүләт педагогика университетының татар теле һәм әдәбияты кафедрасы мөдире, филология фәннәре докторы Илшат Нәсипов шулай дип саный. Бүген ул Казанда татар теле һәм әдәбияты укытучыларының VII Бөтенроссия съезды пленар утырышында “Россия Федерациясе төбәкләрендә татар фән-мәгариф үзәкләре: кичә, бүген иртәгә” темасына чыгыш ясады.

Ул Россия төбәкләрендәге бердәнбер татаристика үзәкләренең - югары уку йортларында эшләгән татар филологиясе кафедралары булганын, аларның мәгариф оешмалары өчен татар теле укытучылары һәм башка белгечләр әзерләгәнен билгеләп узды. Татар халкының теле, мәдәнияте, әдәбияты белән бәйле барлык өлкәләрдә уңышлы хезмәт иткәннәрен әйтте.

“21нче  гасыр башында мондый үзәкләр Мәскәүдә, Төмәндә, Тубылда, Чувашстанның Батыр районында, Ульяновскида, Оренбургта, Ижевскида, Чиләбедә һәм Башкортстанның 4 уку йортында уңышлы эшләп килде. Болар белән бергә, педагогия көллиятләре дә зур эш башкарды”, - дип, ул санап үтелгән урыннарда татар теле укытучыларын әзерләүче бүлекләр ябылганын әйтте. “Барлык көллиятләрдә татар теле укытучылары һәм тәрбиячеләрен әзерләүче белгечлекләр юкка чыкты, йә эше сүлпәнләнеп, сыйфаты югалды. Башкортстан Республикасында мондый бүлекләр яшәп килә, тик монда да югалтулар бар. 2016 елда Бөре шәһәрендә татар бүлеге соңгы чыгарылышын ясады. Уфа һәм Эстәрлетамак шәһәрләрендәге өч татар кафедрасы, үзләрен саклап калсалар да, бик киеренке шартларда эшли. Елдан-ел бюджет урыннары азая, уку планнарында сәгатьләр кыскартылганлыктан, квалификацияле укытучыларны сафта калдыру авырлаша”, - дип сөйләде Илшат Нәсипов.

Ул төбәкләрдә татар кафедраларының файдасы зур булганын, аларның татар мәгарифе сагында торганын әйтте. Төбәкләр һәм Татарстан арасында хезмәттәшлек өчен күпер, җирле татарларның проблемаларын ачыклаучы структуралар булганын белдерде. “Бүген төбәкләрдә азмы-күпме сакланып калган фән, мәгариф үзәкләре булган кафедраларны, көллиятләрнең һәрберсен сакларга кирәк. Кафедраларны яңадан торгызу мөмкинлеге булмаганлыктан, бәлки, аерым төбәкләрдә башка формадагы фән-методика үзәкләрен оештыру кирәктер. Беренче чиратта, минемчә, бу - Төмән яки Тубылда булырга тиеш. Җирле татарларның этномәдәни торышын, мирасын фәнни өйрәнү, мәктәпләр өчен кадрлар әзерләүне Татарстан гына башкарып чыга алмады һәм алмаячак”, - дип саный Илшат Нәсипов.

 

КӨН ҮЗӘГЕНДӘ

18 июльнең төп вакыйгалары - фото һәм сылтамалар

Рөстәм Миңнеханов бюджет акчасын нәтиҗәле файдалануны таләп итте, Изге Болгар җыенына бару өчен һәрбер мөхтәсибәткә автобус биреләчәк.

Рөстәм Миңнеханов Вьетнамның Тулы вәкаләтле илчесе белән хезмәттәшлек турында сөйләште

"Татарстан Россия-Вьетнам мөнәсәбәтләре кысаларында Вьетнам белән хезмәттәшлекне үстерүгә аеруча игътибар итә", - диде президент.

Рөстәм Миңнеханов бюджет акчасын нәтиҗәле файдалануны таләп итте

Татарстан Президенты бюджет баланслы булсын өчен, депутат корпусы белән тыгыз эш барырга тиешлеген җиткерде.

Татарлар беренче тапкыр Канадада "Nuestroamericana-2018" дуслык парадында катнаша

"Nuestroamericana" фестивале Монреальдә быел сигезенче тапкыр үтә.

Илшат Сәетов татар кешесе мәдәни проектларга акча бирергә өйрәнәчәк дип саный

Зуля Камалованың татарча альбомына краудфандинг юлы белән акча җыяр өчен бер атна вакыт калды.